Руската нафтена компанија „Лукоил“ вчера добила потврда од американскиот OФАК дека нејзините подружници во странство можат да работат без пречки до 29 април догодина, пренесе „СЕЕ њуз“.

Сите пумпи на подружниците на „Лукоил“ надвор од Руската Федерација можат слободно да продаваат гориво и да вршат трансакции, доколку нивен сопственик е централата на „Лукоил“ за Европа во Виена.

САД воведоа санкции за „Лукоил“, најголемиот приватен руски производител на нафта, како дел од напорите да извршат притисок врз Москва да ја прекине војната во Украина, како и да ги намалат приходите од енергенси за Кремљ.

Санкциите ја натераа компанијата да најави продажба на својот имот во странство. Повеќе потенцијални купувачи веќе се обратиле до американските власти за дозвола да преговараат со „Лукоил“.

Во Југоисточна Европа, Лукоил управува со повеќе од 220 бензински пумпи во Бугарија, 45 во Хрватска, над 100 во Молдавија, 10 во Црна Гора, 40 во Македонија, 320 во Романија и 112 во Србија. Освен бугарските субјекти и мрежата на бензински пумпи, Лукоил во регионот поседува и рафинерија во Романија и неколку складишта за нафтени производи.

Притиснат од санкциите, „Лукоил“ во октомври ги објави своите планови за продажба на својот меѓународен бизнис. Според медиумските извештаи, неколку потенцијални купувачи се натпреваруваат за имотот на „Лукоил“ во странство, вклучувајќи ги унгарскиот „МОЛ“, „Ексон Мобил“ и „Шеврон“, меѓу другите. САД претходно го отфрлија швајцарскиот трговец со стоки „Гунвор“ како купувач.

„Лукоил Интернешнл“, со седиште во Виена, надгледува повеќе од 100 странски подружници на „Лукоил“ во околу 50 земји. Вредноста на имотот на компанијата се проценува на околу 20 милијарди евра.