Алжирската влада соопшти дека денеска го повикала францускиот амбасадор на разговори за да го осуди „понижувачкиот третман“ што наводно го претрпеле алжирските патници кои пристигнуваат на аеродромите во Париз.

Алжирскиот државен секретар за националната заедница во странство, Софијан Шаиб, го повика францускиот амбасадор Стефан Ромате „за да го информира за цврстиот протест на алжирската влада против таквата целосно неприфатлива акција“, објави телевизијата БФМ.

Како што е соопштено, Шаиб му рекол на францускиот амбасадор дека е неопходно Париз да преземе мерки и да ги запре овие акции и дека Алжир нема да дозволи граѓаните на таа земја да се користат „за целите на притисок, провокација или обиди за заплашување“. пренесува Танјуг.

Тензиите меѓу Франција и Алжир се зголемија откако Париз во јули го поддржа планот за автономија на Мароко за Западна Сахара, територија чиј статус не е дефиниран од ОН и која е сцена на конфликт меѓу Мароко и борците за независност на Фронтот Полисарио, кои се поддржани од Алжир. , според БФМ.

Во Алжир, француско-алжирскиот писател Буалем Сансала беше затворен во ноември, додека алжирски и француско-алжирски влијателни лица беа уапсени поради наводно залагање за насилство во Франција, додаде БФМ.