Ракометниот клуб Алкалоид ја обезбеди иднината на еден од своите клучни играчи. Средниот бек и капитен на тимот од Автокоманда, Игор Ѓорѓиев, стави потпис на нов договор и ќе продолжи да го носи синиот дрес и во наредниот период.

Македонскиот репрезентативец, кој настапи и на последното Европско првенство, е меѓу столбовите на составот предводен од Кирил Лазаров. Токму затоа продолжувањето на соработката со 25-годишниот плејмејкер се оценува како еден од најважните потези на клубот во актуелната сезона.

Иако сè уште е релативно млад, Ѓорѓиев важи за еден од поискусните во соблекувалната. Веќе пет години е дел од Алкалоид и израсна во лидер на генерацијата, а претходно во кариерата настапуваше и за РК Голден Арт и РК Вардар Јуниор.