Губењето на сетилото за вкус и мирис е еден од клучните симптоми што укажува на ковид-19, но постои уште еден сроден симптом, кој би можел да послужи и како знак за предупредување.

Според „Вашингтон пост“, многу пациенти со ковид-19 имаат „искривено“ чувство за вкус или мирис; тие не го изгубиле целосно сетилото, туку тоа е променето. Овој симптом се нарекува паросмија, дисфункција на откривањето на мирисот (изменетост на сетилото за мирис), која може да влијае и на способноста на човекот да ја обработува перцепцијата на аромата – и се чини дека е изненадувачки доминантна кај пациентите со ковид-19.

Инфектологот Џенифер Спајсер од Универзитетот „Емори“ во Атланта, го споделила своето искуство со паросмија по закрепнувањето од ковид-19.

– Мислев дека сум оздравела – рекла таа.

Но, неколку месеци подоцна, Спајсер пиела црвено вино и забележала дека нејзиниот пијалак има вкус „како бензин“. Кафето го имало истиот вкус, а Спајсер наведува и дека месото имало расипан вкус.

Се испоставило дека многу луѓе заболени од ковид-19 ја имале оваа состојба, односно, многу од нив изјавиле дека храната и пијалаците им имаат вкус на бензин или мирис на гнилеж, расипано. Друга жена изјавила за Би-би-си дека откако заболела од ковид-19, „месото има вкус на бензин, а виното има вкус на расипани јаболка“. И другите заболени навеле дека нивната храна има расипан вкус, а виното има вкус на нафта.

Но, освен ковид-19, и другите работи можат да влијаат на вашите сетила. Проблеми со забите, недостаток на хранливи материи во исхраната, алергиите и синусните инфекции исто така може да предизвикаат промени во сетилата за вкус и мирис.