Звучи апсурдно, но во политиката сè е можно, па дури и тоа дека Руската Федерација – која веќе повеќе од четири години спроведува агресија врз суверена Украина – од 26 до 30 мај организираше Прв меѓународен форум за безбедност во Москва, на кој учествуваа делегации од околу 100 земји. Според многумина, Русија се осмели, додека води војна, да дели лекции за безбедност и да поучува како да се постигне мир, кој самата го одбива во Украина преку инсистирање на неприфатливи услови.

Иронијата е уште поголема кога Русите тврдат дека ништо не ги спречува да бидат домаќини на ваков собир, бидејќи не го прифаќаат ставот на западниот свет (дека се агресори) туку своето војување во Украина и понатаму го опишуваат како специјална воена операција, чија цел е денацификација и демилитаризација на таа земја.

Во јазикот на руската пропаганда доминира зборот „нацисти“, што е необично ако се има предвид дека Украина ја води претседателот Володимир Зеленски, Евреин кој минатата година потпиша закон за борба против антисемитизмот. Ова покажува дека руските лидери користат стереотипи за да ја прикријат реалноста и да ја оправдаат инвазијата пред руската јавност, будејќи спомени од Втората светска војна. Кремљ, всушност, ја претставува инвазијата како продолжение на руската борба против злото во војната позната како Голема татковинска војна, очигледно сметајќи на националната гордост поради победата над нацистичка Германија.

Руската агенција за надзор на комуникациите на почетокот на март 2022 година им забрани на медиумите во земјата да известуваат за конфликтот користејќи термини како „војна“, „инвазија“, „напад“ и друго што отстапува од официјалната државна позиција.

Форумот во Москва го организираше Советот за безбедност на Русија, клучното советодавно тело на рускиот претседател кое подготвува одлуки за прашања од националната безбедност и стратешките интереси на државата. Негов секретар е генерал Сергеј Шојгу.

Во мај 2024 година Владимир Путин неочекувано го разреши Шојгу од функцијата министер за одбрана по десет години мандат и на негово место го постави Андреј Белоусов, дотогашен прв потпретседател на руската влада. На Шојгу оваа промена му дојде добро бидејќи се тргна од фронтот каде што загинаа и осум руски генерали, но јавноста во Европа си го поставуваше прашањето зошто Путин првпат поставува цивил на чело на Министерството за одбрана. Објаснувањето беше дека е потребна подобра оптимизација на руската воена економија, бидејќи воените издатоци на Русија достигнаа околу 149 милијарди долари, што претставува повеќе од една третина од државниот буџет , односно дури меѓу 7 и 10 проценти од рускиот БДП. Руското војување во Украина создава огромен притисок врз економијата, која е сè повеќе подредена на воените потреби, а тоа влијае и врз животниот стандард на населението.

Кој сѐ се собра на форумот во Москва? Одговорот не е тежок, со оглед дека присуствуваа министри за одбрана и внатрешни работи, како и експерти од Шангајската иницијатива за соработка, БРИКС и АСЕАН, заедно со претставници од азиски, африкански и латиноамерикански земји.

Главно тоа се сите сојузници на Москва, бидејќи, на пример во БРИКС и во Шангајската иницијатива Русите се заедно со Кина и со Индија, а во организацијата членуваат и Пакистан, Иран и Белорусија. Русија има одлични односи и со сојузот АСЕАН, во кој членуваат Индонезија, Малезија, Филипини, Сингапур, Тајланд, Брунеи, Виетнам, Лаос, Мјанмар (Бурма), Камбоџа и Источен Тимор.

Оваа група држави се спротивставува на одредени аспекти од американската политика, првенствено поради протекционизмот, едностраните царини и притисоците да се определат во геополитичкото натпреварување меѓу Вашингтон и Пекинг.
На учесниците им се обрати и претседателот Путин, кој, без да се осврне на војната во Украина, изјави дека „меѓународниот тероризам, ризикот од неконтролирано ширење на нуклеарното оружје, екстремизмот, трговијата со дрога и сајбер-криминалот претставуваат сериозна закана за сите држави“.

Со оглед на концептот на Форумот и составот на учесниците, не се ни очекуваше Путин да каже нешто за прекин на војната во Украина и воспоставување мир, бидејќи очигледно поедноставно му беше да предупреди на некои познати безбедносни ризици и често повторувани елементи на безбедност , вклопувајќи се во општа теоретска расправа.

Путин исто така истакна дека Русија е подготвена да соработува со сите што го сакаат тоа, во новиот мултиполарен свет, но тешко дека Западот ќе го прифати тој повик, ако се знае дека неговата држава е под санкции од Европската Унија.
На форумот присуствуваше и делегација од Република Српска, составена од Милорад Додик и ентитетскиот министер за внатрешни работи Жељко Будимир. Во своето обраќање Додик, меѓу другото, изјави дека „Европската Унија станува воен сојуз, што е многу опасно за српскиот народ“.

За српскиот и другите народи во Република Српска токму Додик, со својата националистичка политика е најголемата опасност.

Конечно, меѓу учесниците, не се знае по која основа, бил забележан и поранешниот министер за безбедност на Босна и Херцеговина, Ненад Нешиќ, кого Додик, и покрај судењето за казниво дело, се чини дека сака да го рехабилитира.

(Авторот е воено-политички аналитичар)

Ослобоѓење

ЈАЗИКОТ НА КОЈ СЕ НАПИШАНИ, КАКО И СТАВОВИТЕ ИЗНЕСЕНИ ВО КОЛУМНИТЕ, НЕ СЕ СЕКОГАШ ОДРАЗ НА УРЕДУВАЧКАТА ПОЛИТИКА НА „СЛОБОДЕН ПЕЧАТ“