Шведската група „АББА“, основана во 1972 година од Бени Андерсон, Бјорн Улвеус, Ани-Фрид Лингстад ​​и Агнета Фелцког, победи на Евровизија во април 1974 година со песната „Waterloo“.

По повод 50-годишнината од победата на најпознатото музичко натпреварување, групата се огласи на својот инстаграм-профил. Тие објавија фотографија од Евровизија и им се заблагодарија на своите обожаватели за долгогодишната поддршка.

„Малку е вртоглаво да се мисли дека милиони од вас, кои нè гледаа за првпат во финалето на Евровизија во 1974 година, ја пренесоа нашата музика не на една, туку на неколку генерации. Доказ за тоа гледаме секој пат кога еден од нас го посетува ‘Abba Voyage’ во Лондон и затоа можеме да ја прославиме 50-годишнината од тој настан знаејќи дека нашите песни сè уште одекнуваат низ целиот свет“, напишаа тие во заедничката изјава.

„Тешко е да се сфати дека поминаа 50 години откако ние четворицата ги чекавме пресудите на жирито ширум Европа во Брајтон. А кои беа нашите соништа за време на тие напнати моменти и хаос по победата? Четири различни соништа, без сомнение, но какви и да беа, колку и да беа величествени, реалноста ги надмина, тоа е сигурно“, додаваат тие.

„Многу од вас беа со нас од самиот почеток и не следат оттогаш, повеќе од половина век. Музиката што ја откривате и ја сакате додека растете останува со вас засекогаш. Ние го споделуваме тоа искуство со вас и фактот дека нашата музика останува во вашите животи е прекрасна работа“, велат тие.

Тие им се заблагодарија на сите обожаватели ширум светот.

„Со текот на годините бевме благословени со вашата љубов. Сакаме да ви кажеме благодарам за она што ни го давате. Ова е среќен и свечен момент во исто време и можеме само да се надеваме дека разбирате колку длабоко сме благодарни за долга, успешна кариера и вашата непоколеблива лојалност и поддршка низ годините…Ви благодариме“, заклучија тие.

Прославата по повод половина век од победата на „АББА“ на Евровизија, е одбележана и во Шведска, каде во саботата во ударниот термин на телевизија се прикажа документарен филм посветен на групата, а тој документарен филм, напиша „Еуровижн ворлд“, ќе биде прикажан уште во 15 други европски земји до официјалното одржување на Евровизија.