За себе можам да кажам дека сум горд Американец со еврејско потекло. Мојот татко ја напуштил Полска во 1921 година, бегајќи од сиромаштија и антисемитизам. Делот од семејството што останал во Полска страдал од нацистите. Од детството добро знам каде водат антисемитизмот, расизмот, фанатизмот и демагогијата.

Затоа дозволете ми да бидам сосема јасен. Истапите против ужасните и нечовечки постапки на Израел и израелскиот екстремистички лидер Бенјамин Нетанјаху не се антисемитизам. Укажувањето на опасната и деструктивна улога на Израел во обликувањето на американската надворешна и воена политика не е антисемитизам. За тоа треба да размисли секој член на Конгресот и секој Американец.

На 7 октомври 2023 година, терористичката организација Хамас го нападна Израел. Беа убиени повеќе од 1.200 невини мажи, жени и деца, а стотици беа земени како заложници. Како и секоја друга држава, Израел имаше целосно право да одговори на нападот. Но не и да го крши меѓународното право и да води тотална војна со незамисливо уништување против целиот палестински народ — нешто што експертите оправдано го квалификуваа како геноцид.

Израелските власти немаа право од 2,2 милиони Палестинци во Газа да убијат повеќе од 72.000 и да ранат над 170.000 — претежно жени, деца и старци. Немаа право да ја уништат комплетната физичка инфраструктура на Газа, вклучувајќи ги водоводниот и канализацискиот систем, како и електродистрибутивната мрежа.

Немаа право да ги урнат сите 12 универзитети во Газа, како и стотици училишта, и така да го уништат целиот образовен систем таму. Немаа право да оштетат или урнат повеќе од 90% од станбените единици во Газа, поради што огромното мнозинство од локалното население сега живее во шатори.

Немаа право да оштетат или уништат 94% од болниците во Газа и да убијат 1.700 здравствени работници. Немаа право да воспостават блокада на доставата на храна, вода, гориво и лекови — поради што илјадници Палестинци се потхранети, а стотици умреле од глад.

Тој масакр не запира. И покрај таканареченото примирје, хуманитарната помош и понатаму е многу помала од потребната, а Израел продолжува да убива цивили.

Проблемот не е само Газа. Од октомври 2023 година, израелските војници и доселеници на Западниот Брег убиле 1.071 Палестинец, меѓу кои 233 деца, отворено кршејќи го меѓународното право што ги штити палестинските територии. Во исто време урнале повеќе од 6.000 палестински куќи и основале повеќе од 200 нови нелегални населби и пунктови на палестинска територија.

Тоа не се само испади на екстремистички доселеници. Тоа е државна политика. Кабинетот за безбедност на Нетанјаху ги одобри најсеопфатните измени на законскиот статус на Западниот Брег по 1967 година и ги отстрани речиси сите пречки за понатамошно ширење на населбите. Самиот Нетанјаху изјави: „Никогаш нема да има палестинска држава“. Неговиот министер за финансии Безалел Смотрич се пофали дека изградбата на нови населби „засекогаш ќе ја закопа идејата за палестинска држава“.

Сега знаеме дека Нетанјаху го убедил Трамп да започне непотребна и противуставна војна против Иран. Во конфликтот, со кој се прекршени многу одредби од меѓународното право, веќе загинале илјадници цивили, вклучувајќи стотици деца во Иран и Либан, како и 26 израелски цивили и 13 американски војници. Милијарди невини луѓе ширум светот ги трпат економските последици од оваа нелегална војна преку раст на цените и недостиг од основни добра.

Но Газа не му беше доволна на Нетанјаху. Не му беше доволен ниту Иран. Израел во меѓувреме започна војна што се шири на територијата на Либан. Во новата војна веќе загинале повеќе од 2.000 луѓе, а Израел окупираше 14% од либанската територија.

Израелскиот министер за одбрана Израел Кац најави дека сите либански погранични села ќе бидат срамнети со земја според „моделот применет во Газа“ – токму со тие зборови. Безалел Смотрич, министерот за финансии, предупреди дека Дахија, предградие во јужен Бејрут, наскоро „ќе изгледа како Кан Јунис“ — град во Газа што Израел го срамни со земја. Тоа не е закана. Тоа е ветување.

По ужасните и противзаконски постапки на владата на Нетанјаху во последните три години, на американскиот народ му е преку глава од сè. Поддршката за Израел во Америка нагло опаѓа. Според неодамнешна анкета на агенцијата Пју, 80% од демократите имаат негативно мислење за Израел, како и 41% од републиканците. Кај младите, тие проценти се уште поголеми. Неодамнешна анкета на агенцијата Квинипијак покажа дека 60% од испитаниците — вклучувајќи три четвртини од демократите и две третини од независните — се против испраќање американско оружје во Израел.

Затоа ги повикував членовите на Сенатот да гласаат за две заеднички резолуции за неодобрување на испраќањето оружје — што е единствената формална постапка што ни стои на располагање во обидот да се блокира продажбата на вооружување. Во првата резолуција баравме откажување на испораката на бомби од 1.000 килограми во вредност од 151,8 милиони долари.

Во втората баравме блокирање на испраќањето булдожери во вредност од 295 милиони долари, со кои се уриваат куќи во Газа и на Западниот Брег и така физички се елиминира самата идеја за палестинска држава. Булдожерите таму не се дефанзивно оружје. Тие се средство за етничко чистење.

Одамна требаше членовите на Сенатот да го послушаат американскиот народ и да ја запрат американската воена помош за екстремистичката влада на Нетанјаху. Се надевам дека моите колеги сенатори еден ден ќе ми се придружат во овие барања.

Вијести

(Авторот е американски сенатор)

ЈАЗИКОТ НА КОЈ СЕ НАПИШАНИ, КАКО И СТАВОВИТЕ ИЗНЕСЕНИ ВО КОЛУМНИТЕ, НЕ СЕ СЕКОГАШ ОДРАЗ НА УРЕДУВАЧКАТА ПОЛИТИКА НА „СЛОБОДЕН ПЕЧАТ“