Поради пренатрупаност во затворот „Идризово“, додека еден затвореник спие, другиот треба да седи буден и да чека ред бидејќи креветот го делат двајца затвореници. Ова е само дел од забелешките што ги наведе народниот правобранител Насер Зибери во гостување на ТВ21. Состојбата во „Идризово“ е алармантна и условите се бедни и нечовечни, вели Зибери.

„Има ќелии за затвореници од само еден метар кубен простор, има ќелии каде еден кревет го делат двајца затвореници, имаме дел од затворениците кои спијат по ходниците, имаме ќелии каде 50 затвореници користат еден тоалет. Каква хигиена може да има во такви услови, кога еден затвореник спие а другиот седи буден и откако ќе се разбуди другиот, може да спие тој бидејќи делат ист кревет, или кревет што е ставен во ходникот на бетон, или нема топла вода и греење итн.“, вели народниот правобранител.

Зибери за загрижувачки го смета и фактот што околу 80% од 17 затвори колку што ги има во земјава, нема лекар-психијатар, општ лекар и нема процес на ресоцијализација. Зибери вели дека земјава треба да преземе итно мерки за подобрување на условите во правец на проширување на капацитетите, за здравствена грижа но и за проширување на човечките капацитети и за администрацијата.

„Да не зборуваме за внесувањето на недозволени предмети во затворите, како што се дрога, средства за комуникација итн. Состојбата во затворите во Македонија е многу тешка да не речам алармантна. Меѓународните стандарди велат дека еден чувар треба да се грижи за 15 затвореници, а знаете како е во Идризово, за 50 затвореници се грижи еден чувар. Така произлегуваат и други проблеми, напади од страна на затворениците врз чуварите и се става под знак прашалник безбедноста на самите чувари,“ вели Зибери.