Во нов случај на измамата со лажен лекар и сообраќајна несреќа, 71-годишна жена од Скопје останала без досега најголемиот плен во ваквите измами – 36.300 евра.

Како што информираат од МВР, вчера попладне жената ја пријавила измамата.

„Според пријавеното, едно лице ја контактирало телефонски, се претставило како полицаец и ѝ кажало дека нејзината ќерка направила сообраќајна несреќа и е тешко повредена и дека треба да плати за да се направи итна операција. Како што е пријавено, таа повторно била контактирана телефонски, овојпат од лице кое се претставило како лекар и кое и посочило каде да ги остави парите“, пишува во полициското соопштение.

Се преземаат мерки за расчистување на случајот, додаваат од полицијата, иако досегашните мерки не резултираа со расчистување на ниту еден од десетици вакви случаи од почетокот на годинава.