Жарко Кујунџиски: Фестивалот „Букстар“ почнува на 12 октомври, темата е пандемија и книжевност

Жарко Кујунџиски, писател/Фото: Слободен печат

Седмото издание на книжевниот фестивал „Букстар“ годинава ќе се одржува од 12 до 15 октомври и како во претходните изданија ќе ја промовира европската литература.

„Букстар заедно со „Синедејс“ е еден од двата фестивали во Македонија што го има предзнакот европски, со тоа што „Синедејс повеќе третира филм, а „Букстар“ се занимава со книжевниот аспект. И тоа ни беше важно и од аспект на тоа што Македонија ита на патот кон тие евроинтеграции, со одредени застои, но одиме во таа насока и вториот аспект е тоа што европската литература навистина доживува подем, создава диверзитет од различни гласови, пристапи, а сепак проблемите се горе-долу исти, европското општество поминува низ слични премрежја, а ги тематизира и позитивните работи како слобода на изразување, демократија итн. На фестивалот досега учествувале над 30 писатели од буквално сите делови на Европа од Исланд до регионот, од Италија до Шведска. Секоја година се обидуваме да конкретизираме тема на фестивалот, прво е еден вид на слоган и е во дослух со тековните општествени или социјални случувања. Низ годините сме имале разни инспиративни и креативни слогани, а оваа година тоа е „Џенрезис“ (Genresis), што е нов збор, или кованица од ‘Genesis’ – Постанок и жанрови, нормално ова што ни се случува со ковидот стана еден наратив со кој ќе живееме веројатно подолго време и заслужува да го преиспитувам и во склоп на самата литература. Ќе имаме дебата која ќе биде во знакот на жанровите, како оваа ситуација со ковидот се рефлектира на литературата, влијае на стилот на пишување“, вели за Утрински брифинг, Жарко Кујунџиски, писател и уредник на издавачката куќа „Антолог“, кој го организира фестивалот.

Тој рече дека годинава македонските автори ќе ги претставува профеосорот Влада Урошевиќ, ќе се одржи промоција на неговата најнова книга „Viola arsenica; белешки за поезијата“ во соработка со издавачката куќа „Готен“

„Мислам дека поентата на овие фестивали, освен што е славење на литературата, е токму и мобилноста на авторите во двете насоки и овозможување на соработка на долг рок и се отвораат можности за соработка на подолг рок кога ќе ја окрупниме програмата и со агенти од странство“, додава Кујунџиски.

Учесници на „Букстар 2021“ од странство се: Катарина Винклер од Австрија, Огнен Спахиќ од Црна Гора, Сјон од Исланд, кој во 2001 година бил номиниран за „Оскар“ за песните на пејачката Бјорк од филмот „Танчарка во мракот“ на Ларс фон Трир, потоа Балсор Хоџа од Косово, Мариа Вујчиќ и Михаела Гашпар од Хрватска.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот