Володимир Зеленски ќе ја оствари својата прва официјална посета на Ирска во вторник, на 2 декември, откри премиерот Мајкл Мартин, пренесува Би-би-си.

Украинскиот претседател ќе биде придружуван од првата дама Олена Зеленска и ќе се сретне со Мартин, претседателката на парламентот Кетрин Коноли и министерката за надворешни работи Хелен Мекентајр.

Мартин рече дека тој и Зеленски ќе имаат билатерална средба, како и дека ќе присуствуваат на отворањето на Ирско-украинскиот економски форум, кој, според него, „дава можност да се истражи потенцијалот за зајакнување на деловните, трговските и инвестициските врски меѓу Ирска и Украина“.

Зборувајќи пред посетата, премиерот рече: „Чест ми е да ги пречекам претседателот Зеленски и првата дама во Ирска“.

„Низ целиот свет, тој со право е признаен како некој што ја отелотворува храброста и отпорноста на украинскиот народ, кој го инспирираше светот во нивната храбра одбрана на својата земја и нејзиниот суверенитет откако беше брутално и нелегално нападната од Русија“.

„Се сретнав со претседателот Зеленски многу пати, вклучително и во Киев, но особено се радувам да го пречекам на оваа прва официјална посета на украински претседател на Ирска.“

Ирска е верен сојузник на Украина откако Русија ја започна својата инвазија во 2022 година, нудејќи им на околу 120.000 Украинци безбедно засолниште.

Зеленски денес во Париз

Се очекува украинскиот претседател да отпатува денеска за Париз за да се сретне со својот француски колега Емануел Макрон. Двајцата лидери, меѓу другото, ќе разговараат за напредокот во безбедносните гаранции од Алијансата на волјата, како и за содржината на разговорите што се одржаа во Флорида меѓу американски и украински претставници.

Зеленски овој пат ќе биде придружуван од неговата сопруга, Олена Зеленска.

Се очекува украинскиот претседател да биде пречекан попладне во Елисејската палата, од Емануел Макрон. Половина час подоцна, двојката Макрон ќе ја пречека Олена Зеленска.

Ќе следи ручек, а заедничка прес-конференција ќе се одржи по 14 часот.

Зеленски последен пат го посети Париз на 17 ноември.