Крајот на јубилејното 20. издание на Меѓународниот фестивал на европски филм „Синедејс“ беше означен со објавувањето на наградите во официјалната конкуренција на 21 јули во МКЦ Парк, иако програмата на фестивалот продолжи и на 22 јули, за да бидат прикажани и филмовите од одложените проекции поради временските услови.

Натпреварувачката програма на „Синедејс“ ја следеше комисијата во состав Славко Собин – актер, Зејнеп Атакан – продуцентка и Марисела Росети, одговорна за наградата „Лукс“ (LUX Award).

Во официјалната селекција наградата „Златна ѕвезда“ за најдобар филм ја доби „Улиште“ (Hive), во режија на Блерта Башоли, со образложението: „Прекрасен филм и воодушевувачки начин на кој една вистинита приказна беше трансформирана на големо платно, со брилијантна, многу природна и лежерна глума“.

Во „SEE програмата“, наградата „Златно сонце“ за најдобар филм ја доби „Мир и хармонија“ (It’s all about peace and harmony) од Несими Јетик, за кој жирито истакна: „Многу моќен женски филм, што е навистина пријатно да се погледне во овие времиња. Партнерството помеѓу трите актерки е нешто што толку ретко се гледа, изведено е со толку различна динамика, знаете – љубов и омраза и конфликт“.

(Текстот е објавен во „Културен печат“ број 90, во печатеното издание на „Слободен печат“ на 24-25 јули 2021)