Заразеното дете три дена одело во градинката во Струмица, 11 дечиња ставени во изолација

EPA-EFE
Градинките ги отворија вратите за децата / Скопје, 9 септември 2020 / Фото: EPA-EFE/GEORGI LICOVSKI

Во клон на градинката „Детска радост“ во Струмица вчера беше потврден прв позитивен случај на ковид-19 кај петгодишно дете, а во градинката се преземаат сите мерки за  заштита на децата кои биле во контакт со заразениот.

– Во текот на вчерашниот ден добивме известување од родител на дете на возраст од 5 години кое престојува во еден од објектите на детската градинка, дека во нивното потесно семејство имаат лице позитивно на ковид-19 и дека во текот на денот цело семејство ќе биде тестирано како случаи сомнителни на ковид -19. По добиената информација одговорното лице за постапување во нашата градинка веднаш стапи во контакт со службата на ЦЈЗ Струмица и постапи согласно Алгоритамот за постапување во градинките во случај на појава на дете со симптоми, сомнително/ позитивно на ковид-19. Во текот на денешниот ден ја добивме информацијата од ЦЈЗ дека детето е позитивно на ковид-19, согласно Алгоритамот за постапување ги преземавме сите мерки и ги обезбедивме податоците за останатите дечиња – вели Васил Бубев, директор на ЈОУДГ „Детска радост“ Струмица.

Бубев додава дека набргу по ова е извршена дополнителна дезинфекција во градинката, како и тоа дека 11 дечиња се ставени во изолација.

– На увид пристигна епидемиолошката служба на ЦЈЗ, која утврди дека во градинката се почитуваат сите мерки и препораки согласно Протоколот за работа и даде насоки за изолација на 11 дечиња кои престојуваа заедно со детето позитивно на ковид-19, изолација на воспитно- негувателскиот кадар од групата и вонредна дезинфекција која се изврши веднаш по заминување на дечињата од групата – додава Бубев.

Како што потврди директорот, петгодишното дете градинката ја посетувало само три дена.

– Детето ја посетувало нашата градинка во деновите среда, четврток и петок, а од понеделник не било носено на градинка. Согласно констатацијата на епидемиолог, детето е заразено во контакт со позитивен на Ковид-19 член на фамилијата – заврши Бубев.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот