Заев на суд, ќе сведочи за „Таргет и Тврдина“
Како сведок на Јавното обвинителство на рочиштето за случајот „Таргет и Тврдина“, денеска во Кривичен ќе сведочи шефот на македонската Влада, кој ќе ги изнесе своите сознанија за нелегалното прислушување од УБК.
Сведочењето на Заев следува откако пред две недели заврши со исказ поранешниот разузнавач и негов советник, Зоран Верушевски. Досега во овој случај сведочеа и двајцата свиракачи од УБК, Ѓорѓи Лазаревски и Ѕвонко Костовски.
Никола Груевски треба да биде првообвинет во случајот за нелегалното прислушување. Тој заедно со другите двајца бегалци во Грција, Горан Грујевски и Никола Бошкоски се фокусот на креацијата на документацијата, рече Верушевски во неговото сведочење во Основниот кривичен суд во Скопје за случајот Таргет-Тврдина.
Во Таргет-Тврдина првообвинет е поранешниот директор на УБК Сашо Мијалков, поранешниот началник на Петтата управа во МВР Горан Грујевски и вработениот во УБК Никола Бошкоски, како и поранешната министерка за внатрешни работи Гордана Јанкулоска, шефот на кабинетот на Мијалков, Тони Јакимовски, Владимир Варелов од УБК и уште пет други лица од Управата.
Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.