Во Клиничкиот Центар „Мајка Тереза“ при Медицинскиот факултет во состав на Универзитетот „Св. Кирил и Методиј “ во Скопје беше добиен и поставен демо роботски хируршки систем „Еџ медикал“, на кој успешно е изведена првата уролошка операција асистирана од робот во Македонија, а според достапните информации и прва од ваков тип во поширокиот регион, соопшти Министерството за здравство.

Станува збор за уролошка операција кај пациент со карцином на простата, изведена со примена на најсовремена роботска технологија и минимално инвазивен хируршки пристап.

Операцијата ја изведе тимот на Клиниката за урологија, предводен од д-р Виктор Станков, научен соработник и специјалист-уролог. При зафатот беше користен роботскиот хируршки систем „Еџ медикал“, со примена на метода „сингл сајт“, односно хируршки пристап преку еден единствен отвор.

Државното здравство со ова прави „историски исчекор“ во развојот на минимално инвазивната роботска хирургија, отворајќи нови можности за современ третман, велат од МЗ.

„Овој пристап овозможува поголема прецизност при интервенцијата, помала траума за пациентот, намалена постоперативна болка и побрзо закрепнување. Според достапните сознанија, ова е и прва примена на Single Site метода од ваков тип во Европа“, се вели во соопштението.