Од денеска почнува со работа Алијансата за родова еднаквост, платформа која ќе се стреми да го адресира предизвикот на родовата нееднаквост со фокус на работното место. Претседателка на Алијансата е Нина Ангеловска, позната во јавноста како поранешна министерка за финансии и ко-сопственичка на „Групер“. Taa вели дека нееднаквоста меѓу жените и мажите не е проблем на днешницатa, туку постои одамна, а патот што треба да се изоди за надминување на разликите е многу долг.

– Податоците покажуваат дека жените во Северна Македонија се помалку платени за 12 проценти од мажите за иста работа, а забележително е и присуството на предрасудите и стереотипите, поради што е потребна охрабрувачка култура за жените можат да го дадат својот придонес. Инаку во ЕУ процентот на пониски плати кај жените е уште поголем и изнесува 14 отсто, но секако тоа не треба да ни биде утеха – рече Ангеловска.

За предрасудите и стреотипите, на промовирањето на Алијансата зборуваше и министерката за труд и социјална политика, Јованка Тренчевска.

– Во моментов сме посветени на подготовка на нови законски решенија што ќе значат унапредување на родовата еднаквост, во посебните области од општественото живеење. Интензивиран е процесот на подготовка на Законот за работни односи, каде ќе биде транспонирана целосно директивата на Европската Унија за хармонизација на семејниот и професионалниот живот, што ќе значи дополнително унапредување на положбата на жените на пазарот на труд и подобрување на работните услови- информираше министерката Тренчевска.