На денешен ден, 25 јули 1946 година, во Скопје е родена Љупка Димитровска, една од најпознатите македонски пејачки и едно од најголемите имиња на забавната музика во поранешна Југославија.

Уште кон крајот на шеесеттите години таа се преселила во Загреб, каде што ја изградила својата богата музичка кариера. Врвот на популарноста го достигнала во седумдесеттите и осумдесеттите години, кога нејзините песни биле неизоставен дел од радиостаниците, музичките фестивали и телевизиските емисии низ целиот регион.

Меѓу нејзините најголеми хитови се „Чибу, чиба“, „Твоја барка мала“, „Ја га хочу, а он мене нече“, „Године нису важне“, „Нема више љубави“, како и „Ѕвона, ѕвонат“, која во 1990 година ја изведе на „Макфест“ и остана една од нејзините најпознати песни кај македонската публика.

Покрај успехот во Југославија, Димитровска беше исклучително популарна и во странство. Настапуваше на бројни фестивали, освојуваше престижни награди, а нејзини плочи беа издавани во Чехословачка, Источна Германија и други европски земји. Голем успех постигна и со дуетите со Ивица Шерфези, со кого сними неколку безвременски песни.

Нејзиниот животен и професионален сопатник беше композиторот, диригент и продуцент Никица Калоѓера, автор на голем дел од нејзините најголеми хитови. Во брак беа речиси четири децении, сè до неговата смрт во 2006 година.

Иако на сцената секогаш беше насмеана и ведра, зад себе носеше и голема лична болка. Смртта на сопругот тешко ја погоди, а во краток временски период ги загуби и мајката и сестрата. Сепак, својата тага никогаш не ја истакнуваше во јавноста, туку остана запаметена по насмевката, позитивниот дух и љубовта кон музиката.

Љупка Димитровска почина на 3 октомври 2016 година во Загреб, на 70-годишна возраст.

Зад себе остави богата дискографија, бројни фестивалски настапи и песни што и денес ги пеат генерации слушатели, а нејзиното име останува запишано меѓу најголемите музички легенди на овие простори.