Екипата на Тотенхем го одложи процесот за обновување на сезонските билети, поради сериозната опасност клубот да испадне од Премиер лига кое според позицијата на табелата колку и чудно да звучи за лондонскиот клуб може да биде реалност.

Фановите можат да почнат да ги обнуваат билетите од денеска, меѓутоа рокот кој претходно беше до 15 март, сега е продолжен до 7 јуни, па така навивачите ќе имаат можност да ја видат разврската на сезоната, па потоа да се одлучат дали да го продолжат членството.

Во меѓувреме, клубот уште во февруари донесе одлука цените на сезонските билети да останат непроменети, по консултациите со навивачките групи.

Во спортска смисла, ситуацијата во клубот дополнително се влоши по назначувањето на Игор Тудор за привремен менаџер по отказот на Томас Франк. Под водство на хрватскиот стратег, тимот забележа четири порази на исто толку натпревари, а убедливиот пораз од Атлетико Мадрид со 5-2 речиси ги елиминираше од Лигата на шампионие.

Во моментов Тотенхем се наоѓа само еден бод над зоната за испаѓање, додека директните конкуренти за опстанок, Нотингем форест и Вест хем, прикажуваат подобра форма во финишот на сезоната.