Изложба на дела од ликовната колонија „Дрен 2023“, што во своето 15-то издание се одржа во јули 2023 година, отворена е во ликовната галерија на НУЦК „Марко Цепенков“ во Прилеп.

На изложбата се претставени новосоздадени дела од уметниците Павлина Копано, Славица Танеска, Александра Димитрова, Мирјана К. Массети, Дамјан и Елена Ѓуров, Стефан Анчевски, Благојче Наумоски – Бане, Методи Исков, Маја Ралева Миладиновски, Филип Јовески, Филип Перески, Маја Танеска, Тони Чатлески, Верче Николоска, Славчо Павлески, Габриел Димитровски, Филип Ристески, Елена Пантелиќ и Марјан Стојаноски.

Користејќи различни материјали, како дрво, метал, прилепски мермер, односно природни материјали, уметниците создадоа творби кои остануваат трајно наследство за Центарот и на државата, бидејќи колонијата се реализира со поддршка на Министерството за култура. Преку 30 дела од меѓународната ликовна колонија „Дрен 2023“ се на увид пред љубителите на уметноста.

– Од многубројното и разнообразно творештво коешто го создадоа уметниците – сликари и скулптори, можат да се препознаат и дефинираат повеќе разни ликовни стилови: експресионизам, минимализам, асоцијативна и геометриска апстракција, како и фантастичен реализам – истакнува м-р Викторија Васева Димеска, историчар на уметност.