„Револтирани сме од постојаните лаги кои ги шират надлежните за нас и затоа во петок ќе ги радикализираме протестите и ќе ги извадиме на улица сите автобуси со кои располагаме. На клучните сообраќајници во Скопје ќе бидат паркирани нешто повеќе од 200 автобуси на превозниците од двете здруженија „Слобода превоз“ и „Макекспрес“ и на тој начин ќе го „парализираме“ Скопје“ – ова го најави Ленин Јовановски, првиот човек на „Слобода превоз“.

– Со оглед на информацијата од МВР дека доаѓа висока делегација од Германија на чело со претседателот, лично ги замолив превозниците да покажат со гест дека не сакаат да го нарушат угледот на државата и да ги отежнат безбедносните протоколи – да се повлечат од блокадите во период на присуство на делегацијата односно до четврток, а доколку дотогаш не се постигне некаков договор со Градот Скопје и ЈСП, на улица ќе излезат повторно во петок – вели Јовановски.

Според него, точно кои се крстосници и фрекфентни улици и булевари ќе бидат блокирани во петок, ќе се знае откако претставници на приватните превозници ќе се договорат и ќе одлучат кои се чекори ќе ги превземат понатаму. Сепак, како што истакна Јовановски, граѓаните за секоја нивна одлучат ќе бидат навремено информирани.

– Возачите на автобусите се револтирани. Наместо да се обидеме сите засегнати страни да најдеме соодветно решение за настанатата ситуација, градоначалничката Данела Арсовска шири невистини за нас – вели првиот човек на „Слобода превоз“ кој вели и дека и покрај сите тврдења, тие како групација поседуваат 131 автобус, а приватните превозници од „Макекспрес“ пак располагаат со 77 автобуси.