Министерството за надворешни работи на Србија објави „семафор“ со совети за патување, на кој сите земји во светот се поделени во четири категории, од зелена до црвена, според проценката на безбедносните ризици, пренесува Нова.рс.

Во црвената категорија, министерството ги класифицираше земјите во кои на граѓаните на Србија не им се препорачува да патуваат од безбедносни причини.

Меѓу 23-те земји во кои на граѓаните на Србија не им се препорачува да патуваат, има 14 земји на Блискиот Исток: Бахреин, Израел, Ирак, Иран, Јемен, Јордан, Катар, Кувајт, Либан, Оман, Палестина, Саудиска Арабија, Сирија и Обединетите Арапски Емирати.

Во црвената категорија се вклучени Украина, Авганистан, Либија, Гвинеја-Бисао, Јужен Судан, Мали, Сомалија, Судан и Централноафриканската Република.

28 земји во портокаловата категорија и 61 во жолтата категорија

Во портокаловата категорија има 28 земји за кои важи препораката „патувајте само во случај на екстремна вонредна состојба“, а единствената европска земја на таа листа е Хрватска.

Во жолтата категорија се земјите за кои важи советот „патување со дополнителни мерки на претпазливост“. Тука се 61 земја, а од Европа е ставена само Албанија. Сите други земји во светот се класифицирани во зелената категорија, што значи „слободно патување со вообичаена претпазливост“.