Во галеријата „Остен“ е поставена изложбата „Дијалог на форми“ на двајца извонредни уметници
Во галеријата „Остен“ на 25 јуни беше отворена изложбата „Дијалог на форми“ на уметниците Мице Јанкуловски и Блаже Крстаноски Блажески. Со слики од Мице Јанкуловски и скулптури од Блаже Крстаноски Блажески изложбата го истражува длабокиот дијалог помеѓу двајца автори, две уметнички дисциплини и два креативни света. Изложбата е место на средба во која формите водат свој разговор, без зборови, но со силен визуелен јазик.
Препорачано
-
1
-
2
-
3
Посетителот има можност до 8 јули да ја доживее уметноста како жив разговор – разговор што не бара посредник, туку самиот гледач станува учесник во него. Формите на платната и формите во просторот комуницираат, се надополнуваат, понекогаш и контрастираат, но секогаш создаваат целина – хармонична или дисхармонична.
Мице Јанкуловски (1954) завршил Архитектонски факултет на универзитетот „Св. Кирил и Методиј“ Скопје. Како уметник, со децении е јавно присутен преку повеќе уметнички дисциплини (карикатура, сликање сатирични слики на стакло, анимиран филм, палиндроми…), додека постојано е посветен на истражувањето и создавањето во областа на сликарството и цртежот.
Неговата биографија содржи повеќе од шеесет самостојни изложби во земјата и во странство и забележителни претставувања на значајни меѓународни изложби и биенални манифестации, како во Фиренца, Санкт Петербург, Солун, Венеција, Торино, Ларнака, Варна…
Блаже Крстаноски Блажески (1954) е македонско-австралиски скулптор чии дела го истражуваат континуитетот, моќта и органските ритми на природниот свет. Во современите форми кои ги создава, централни елементи се поврзаноста и континуитетот – идеи кои можеби произлегуваат и од неговото сопствено искуство како уметник кој е мост меѓу две култури: македонското културно наследство и современите австралиски уметнички текови.
Неговиот опус вклучува слики, цртежи и објекти, а темите често се инспирирани од идентитетот, миграцијата и духовното наследство. Во 2025 година, Крстаноски го доби престижното признание „Остенов уметник на годината“, што претставува потврда за неговото место во македонската и светската ликовна сцена.
(Текстот е објавен во „Културен печат“ број 337, во печатеното издание на весникот „Слободен печат“ на 27-28.6.2026)
