По наредба на Вишото јавно обвинителство во Белград, Специјално одделение за високотехнолошки криминал, полицијата го уапсила М.Т. за кривично дело загрозување на безбедноста, објавија утрово провладините таблоиди.

М.Т., за кој се вели дека се претставува како Младен Тањга на социјалните мрежи, наводно објавил стихови на Твитер (Х) „во кои директно му се заканува на семејството на претседателот Александар Вучиќ“.

Тој е обвинет дека напишал пораки на социјалните мрежи во кои пишува: „Ќе го убијам татко ти, ќе ја заколам мајка ти, ќе ги мачам братот, синот и ќерката…“. Осомничениот се заканувал и дека ќе ја убие и претседателката на српското собрание, Ана Брнабиќ.

Провладините медиуми наведуваат дека лицето било блиско до српската опозиција и дека има големо полициско досие.

Тој и претходно бил уапсен и осуден за неовластено производство, држење и пуштање во промет на наркотици и загрозување на безбедноста.

За претходни кривични дела бил осуден на година и пол затвор, а и претходно бил познат по жестоки јавни испади.