Владата и Канцеларијата на Обединетите нации за проектни услуги (УНОПС) потпишаа продолжување на договорот за партнерство за ремедијација на малата депонија контаминирана со линдан на локацијата на поранешната фабрика ОХИС во Скопје. Со договорот се обезбедуваат дополнителни 12 милиони евра од Владата, преку Генералниот секретаријат, и се утврдува тригодишен период за завршување на сите преостанати активности.

Ремедијацијата на малата депонија, која опфаќа пет бетонски базени, започна во 2021 година. Досега се ископани и спалени 1.969 тони HCH отпад и 586 тони контаминирана почва, што претставува околу 60 проценти од планираното чистење. Активностите досега беа финансирани од Владата, Европската Унија и Кралството Норвешка.

Со продолжувањето на договорот, од Владата велат дека се создаваат услови не само за целосна ремедијација на малата депонија, туку и за отпочнување активности за санација на поголемата депонија контаминирана со линдан на локацијата ОХИС.