Поради тековната безбедносна ситуација во регионот, летовите до и од Саудиска Арабија се суспендирани до 7 март, соопшти авиокомпанијата „Визер“.

„Континуирано ги следиме случувањата и сме во постојан контакт со локалните и меѓународните власти, агенциите за безбедност во воздухопловството и другите релевантни институции. Како што се развива ситуацијата, можно е да бидат донесени дополнителни оперативни одлуки и да дојде до измени во распоредот на летови“, се наведува во соопштението.

Од авиокомпанијата додаваат дека патниците ќе бидат навремено информирани за сите очекувани промени. Патниците кои ги резервирале своите билети преку трети страни треба директно да се обратат до агенциите или платформите преку кои ја извршиле резервацијата.

„Безбедноста и сигурноста на нашите патници, екипажот и воздухопловите останува наш највисок приоритет. Свесни сме дека ова може да предизвика одредени нарушувања во патувањата“, наведуваат од „Визер“.

Исто така, претходно беше најавено дека летовите до и од Израел, Дубаи, Абу Даби и Аман остануваат суспендирани до 7 март.