Американскиот специјален претставник Стив Виткоф и зетот на американскиот претседател Доналд Трамп, Џаред Кушнер, ќе се сретнат со главниот преговарач на Украина, Рустам Умеров, за да продолжат разговорите за завршување на војната во Украина, откако Виткоф и Кушнер се сретнаа со рускиот претседател Владимир Путин во Москва, објави Асошиејтед Прес, повикувајќи се на висок функционер од администрацијата на Трамп.

Виткоф и Кушнер во вторник одржаа петчасовен состанок со Путин во Кремљ, за време на кој разговараа за мировниот план предложен од Вашингтон.

Двајцата го информираа Трамп за состанокот порано денес, по што Трамп рече дека разговорите во Москва поминале „разумно добро“, но дека „останува да се види што ќе се случи следно“.

„Не можам да ви кажам што ќе произлезе од тој состанок, бидејќи се потребни двајца за танго“, рече Трамп.

Американскиот претседател рече дека „Путин сака војната да заврши“.

На 30 ноември во САД се одржа состанок меѓу украинската и американската делегација во врска со планот за воспоставување мир во Украина, објави Танјуг.

Претходните преговори се одржаа на 23 ноември во Женева со учество на европски претставници.