Организаторите на Вимблдон минатата сезона одлучија да не го одржуваат престижниот грен слем турнир поради пандемијата на коронавирусот, но оваа година се враќа во тенискиот календар.

Соопштено е дека традиционално третиот грен слем во сезоната ќе се одржи од 28 јуни до 11 јули 2021 година, и тоа со присуство на помала публика.

Според веб-страницата на Вимблдон, приоритет ќе бидат јавното здравје и безбедноста на учесниците, гостите, навивачите и вработените на турнирот.

Напоменато е дека конечната одлука за точниот број на гледачи на трибините ќе биде донесена што е можно подоцна за да се овозможат што повеќе гледачи.

Еден од условите за учество на овој настан е сите играчи и членови на нивниот тим да бидат сместени во официјалните хотели на организаторите.

Минатогодишниот Вимблдон беше откажан поради коронавирусот, тоа беше првото и единствено откажување на легендарниот турнир по Втората светска војна.

Во 2019 година првиот светски рекет Новак Ѓоковиќ во големото финале во Лондон го совлада Рожер Федерер со 7:6 (5), 1:6, 7:6 (4), 4:6 и 13:12.