Вилите на „Радика Ресорт“ наместо да се уриваат, се градат, надлежните молчат
Во Леуново забрзано се градат и бетонираат објектите за кои уште пред два месеца Општина Маврово Ростуше донесе решение дека треба да бидат урнати.
„МВР и надлежниот градежен инспектор на Општината, Ќирко Џуковски на наш повик денеска извршија увид на локацијата и можеа да се уверат дека и натаму се градат вилите во сопственост на „Радика Ресорт“ иако има решение за уривање, а јавното обвинителство за тоа им поднесе кривични пријави на газдите на хотелот“, вели Владимир Лазаревски, претседател на месната заедница во ова мавровско село.
Тој и Круме Дишлиски како претставници на локалното население денеска присуствуваа на увидот на полицијата и на инспекторите.
„Бараме санкции за одговорните кои ги игнорираат законите“, додава Лазаревски.
„Слободен Печат“ со денови не успева да го добие инспекторот Џуковски и покрај тоа што му упативме бројни телефонски повици, пораки, па дури побаравме и помош од општинската администрација на Маврово-Ростуше. Џуковски, меѓу другото, е одговорен за спроведување на решението за уривање на спорните објекти во Леуново.
Локалното население и сопствениците на викенд куќите крај Мавровското Езеро се револтирани поради тоа што локалните власти не ги спроведуваат законите и ја толерираат бетонизацијата на Маврово која предизвикува и сериозни проблеми со водоснабдувањето. Тие најавија протест и блокада на патишта за овој викенд во Маврово и бараат да се запре продажбата на државно земјиште во националниот парк, да се спречат дивоградбите, да не се издаваат дозволи за градба во заштитната зона на Мавровското Езеро и да се реши водоснабдувањето. Претходно најавениот протест беше одложен поради локалните избори.