Советот на Град Скопје воведe забранa за изнесување и депонирање на отпад во периодот од 22 часот до 6 часот наутро. Следствено, за сите оние кои нема да ја почитуваат мерката, ќе следуваат соодветни казни -за граѓаните и правните субјекти следуваат казни од 50 до 1.800 евра, соопшти новиот директор на ЈП „Комунална хигиена-Скопје“, Драги Митковски.

„Слободен печат“ направи анкета во која ги праша граѓаните што мислат за оваа забрана, дали мислат дека оваа забрана ќе донесе ред во управувањето со сметот и дали оваа забрана би претставувала проблем за локалите и рестораните кои завршуваат со работно време по полноќ?

Повеќето од анкетираните беа оптимистични на оваа тема и сметаа дека оваа мерка ќе вроди со плод, но имаше и дел кои сметаа дека оваа мерка е апсурдна.

– На секоја иницијатива треба да ѝ дадеме време да заживее, наместо сè по дифолт од одма да критикуваме, колективно. Ја поддржувам идејата – изјави една госпоѓа.

– Јас мислам дека ова е една многу непотребна одлука којашто прави еден многу глупав хендикеп, не гледам некоја особена придобивка од мерката ако се забрани фрлање отпад – вели еден од анкетираните.

На прашањето дали мислат дека оваа мерка ќе вроди со плод, граѓаните одговорија:

– Да – рече една госпоѓа.

-Да ми простите, ама имам извесна резерва. Но, би сакал да биде добро – изјави еден повозрасен граѓанин.

Оваа мерка се коси со работното време на речиси сите локали и ресторани, затоа ги прашавме граѓаните дали оваа забрана ќе претставува проблем за нив, на што граѓаните одговорија:

-Сите треба да пробаме да почитуваме, наместо да филозофираме без да се потрудиме – рече една госпоѓа.