Трагичниот биланс од поројните дождови на островот Јава во Индонезија, кои предизвикаа лизгање на земјиштето се искачи на 21 загинат, додека спасувачките екипи продолжуваат со потрагата по преживеани.

Обилните дождови во планинска област во близина на градот Пекалонган во централна Јава предизвикаа лизгање на земјиштето во понеделникот, уривајќи мостови и покривајќи куќи и возила со кал.

„Од утрово, најдовме 21 мртов и сè уште бараме 5 лица“, рече Будионо, началник за пребарување и спасување на соседниот град Семаранг.

Во селото Касибар, најтешко погодено од свлечиштето, тешка опрема се користи за претрес на домот на локален функционер и кафуле каде што се верува дека во урнатините се и други жртви, кои се засолниле од дождот.

„Ние ги фокусираме нашите истраги на две места и на блиската река, бидејќи жртвите можеби биле однесени таму од водата“, продолжи Будионо.

Најмалку 13 лица се повредени во свлечиштето, според службата за пребарување и спасување.

Во Индонезија често се случуваат свлечишта за време на сезоната на дождови, помеѓу ноември и април, но и некое време надвор од оваа сезона. Оваа појава се влоши во некои области поради уништувањето на шумите.