ВИДЕО | Телеграф: „Тенкот глуварче“ – симбол на очајот на руската армија
Најновата верзија на рускиот тенк, таканаречениот „тенк глуварче“, не претставува технолошки напредок, туку јасен показател за очајот на руската армија, оценува Хамиш де Бретон-Гордон, поранешен командант на Комбинираниот хемиски, биолошки, радиолошки и нуклеарен полк на британската армија, во анализа за весникот „Телеграф“.
Препорачано
Тенкот, кој руското Министерство за одбрана го претстави минатата недела, е обид да се намалат огромните загуби на оклопни сили во војната во Украина. Според проценките, Русија досега изгубила повеќе од 6.000 тенкови – бројка поголема од загубите во Курската битка за време на Втората светска војна, која го означи првиот голем пораз на нацистичка Германија на Источниот фронт.
Footage of Russian armoured vehicles kitted out in winter camouflage and new “dandelion”-type “reinforcement” armour. pic.twitter.com/ZvEy2qv11R
— Blackrussian (@Blackrussiantv) January 16, 2026
По „тенковите желки“, обложени со груб лим, и „ежовите“ со челични шилци, „глуварчето“ е најновата импровизирана верзија на заштита, украсена со метални „ливчиња“, наменети како одбрана од украинските беспилотни летала. Според де Бретон-Гордон, ваквите решенија се примитивен одговор на модерната закана од дронови и укажуваат на недостиг од вистински технолошки иновации.
За разлика од Русија, Велика Британија и нејзините сојузници инвестираат во електронско војување и системи за активна заштита, способни да неутрализираат дронови и ракети, наместо да заваруваат импровизиран оклоп на возила вредни милиони.
Авторот предупредува дека рускиот „тенк глуварче“ ги нарушува трите основни принципи на дизајн на тенкови – огнева моќ, заштита и мобилност. Иако главниот топ од 125 милиметри на Т-90 останува моќен, видливоста и прецизноста се сериозно ограничени поради металниот кафез. Дополнително, зголемената силуета го прави тенкот полесна мета, а тежината и обемот значително ја намалуваат неговата мобилност.
Според де Бретон-Гордон, овие импровизирани модификации всушност ги прават руските тенкови полесни, а не потешки за уништување. Иако тоа може да се смета за добра вест од воена перспектива, тој изразува загриженост за слабо обучените екипи кои се принудени да управуваат со овие „подвижни ковчези“, со цел Кремљ да создаде привид на напредок на фронтот.
