На две кола до крајот на натпреварувачката сезона 2022/2023 фудбалерите на Струга Трим Лум и официјално станаа шампиони во Првата македонска лига, прва титула во нивната клупска историја.

Стружани на домашен терен убедливо со 3:0 го надиграа составот на Силекс со двата голови на Шабани и еден на Ибраими.

Составот на Струга Трим Лум предводен од тренерот Шпетим Дуро имаат недостижни седум бода пред второпласираниот Шкупи во генералниот пласман.

Тимот на Гоце Седлоски кој ја бранеше титулата од минатата сезона со 2:1 во дербито триумфираше над Шкендија. Тетовските „црвено-црни“ водеа со погодокот на Чинари, но клубот од Чаир направи целосен пресврт по погодоците на Адетунџи и Илиески.

Доста голови имаше на останатите три средби: Академија Пандев – Тиквеш 1:4, Македонија ЃП – Победа 7:0 и Работнички – Брегалница Штип 5:4.

На табелата води Струга Трим Лум со 62 бодови, пред Шкупи кој има 55, а на третата позиција е Шкендија со 54, 10 повеќе од Силекс на четвртото место.