Добитникот на Пулицерова награда, новинарот и воен дописник, Питер Арнет, почина на 91-годишна возраст по борба со рак на простата, објави Гардијан.

Арнет, кој ја освои Пулицеровата награда во 1966 година за неговото известување за Виетнамската војна за Асошиејтед Прес, почина во среда во Њупорт Бич опкружен со пријатели и семејство, според неговиот син, Ендру Арнет.

„Питер Арнет беше еден од најголемите воени дописници на својата генерација – бестрашен, храбар и брилијантен писател и раскажувач. Неговото новинарство во печатените медиуми и на телевизија ќе остане наследство за амбициозните новинари и историчари од следната генерација“, рече главната дописничка на АП за Обединетите нации, Едит Ледерер.

Како дописник за американската новинска агенција, Арнет стана познат во новинарскиот свет кога известуваше за Виетнам од 1962 година до неговиот крај во 1975 година.

Сепак, тој стана широко познат во 1991 година, откако ги емитуваше најновите вести за Си-ен-ен во живо од Ирак за време на првата Заливска војна.

Тогаш, додека речиси сите западни новинари го напуштија Багдад во деновите пред инвазијата предводена од САД, Арнет остана и, кога ракетите почнаа да паѓаат врз градот, тој ги емитуваше вестите во живо преку мобилен телефон од својата хотелска соба.

„Имаше експлозија веднаш до мене, можеби ја слушнавте“, беше фразата што ја изговори неколку секунди по гласниот удар на ракета, а додека зборуваше, во позадина се огласуваа сирени за воздушен напад.

Неговата професионална кариера

Арнет остана во АП до 1981 година, кога се приклучи на новоформираната Си-ен-ен.

На американската телевизиска мрежа, тој обезбеди ексклузивни и контроверзни интервјуа со Садам Хусеин и идниот организатор на терористичкиот напад на 11 септември, Осама бин Ладен.

Сепак, тој поднесе оставка во 1999 година, неколку месеци откако мрежата повлече истражувачки извештај што не го подготвил, но го презентирал, во кој тврдеше дека смртоносниот сарин бил употребен против американски војници кои дезертирале во Лаос во 1970 година.

Во 2003 година, тој известувал за втората Заливска војна за NBC и National Geographic кога бил отпуштен поради интервју за ирачката државна телевизија, за време на кое ја критикувал стратегијата на американската војска.

Неговите изјави биле осудени во неговата татковина како антиамерикански. Во 2007 година, тој прифатил позиција како професор по новинарство на Универзитетот Шанту во Кина, а по пензионирањето во 2014 година, се преселил со сопругата во предградието Фоунтин Вали во Јужна Калифорнија.