Кошаркарите на Олимпијакос обезбедија место во финалето на Евролигата, откако во полуфиналниот дуел во Атина убедливо го совладаа Фенербахче со 79-61.

Грчкиот состав уште од самиот старт наметна силно темпо и со цврста одбрана отвори со серија од 8-0, додека турскиот тим тешко доаѓаше до организирани напади и лесни поени. Иако актуелниот европски шампион во продолжението успеа накратко да фати ритам и да намали дел од негативата, Олимпијакос постојано ја контролираше играта и на полувреме замина со предност од 33-24.

Во третата четвртина домаќините дополнително го засилија притисокот и стигнаа до двоцифрена разлика, предводени од расположениот Саша Везенков. Фенербахче се обидуваше да остане во игра преку Тарик Биберовиќ и Тејлен Хортон-Такер, но грчкиот тим без поголеми проблеми ја одржуваше контролата и пред последната четвртина имаше високи +15.

Турскиот претставник со серија 8-0 го отвори последниот период и накратко внесе неизвесност, но Олимпијакос брзо одговори, повторно ја стабилизира играта и не дозволи пресврт. До крајот домаќините сигурно ја зачуваа предноста и со убедлив триумф се пласираа во големото финале на Евролигата.

Најефикасен во победничкиот состав беше Алек Питерс со 17 поени, додека кај Фенербахче ист број поени постигна Биберовиќ.