ВИДЕО | Од Скопје до Гевгелија луди саботни журки, без маски, без дистанца и без инспектори во контрола
Во текот на вчерашната вечер, на целата територија на нашата држава, дискотеките и ноќните клубови работеа со „полна пареа“.
Како што можеше да се забележи од бројните објави на социјалните мрежи, Македонците се забавуваа без маски, без дистанца и без инспектори во контрола, исто како во старите добри денови – пред појавата на коронавирусот. Видеата се преземени од официјалните инстаграм-профили на ноќните клубови.
Владата на Северна Македонија на редовната 115. седница, согласно моменталната епидемиолошка состојба во државата, на предлог на Комисијата за заразни болести, ја дозволи работата на баровите и ноќните клубови – дискотеките, како и на угостителските објекти кои се регистрирани за прослави (веселби, свадби, родендени, крштевки и слично) во затворениот дел на објектите до 50% исполнетост од капацитетот на просторот. За евидентното прекршување на мерките во ноќните клубови и дискотеки, „Слободен печат“ побара, но не доби коментар од државниот пазарен инспекторат.
Бројките на позитивни пациенти секојдневно растат, а моментално во државата има вкупно 7217 активни случаи на ковид-19, откако вчера беа регистрирани 601 нов случај на заболени.