Родителите кои ги загубија своите деца во катастрофалниот пожар во дискотеката „Пулс“ во Кочани денеска повторно излегоа на протест во Кочани, вклучително и пред полициската станица. Облечени во црно, држејќи ги фотографиите на загинатите најмили, упатија пораки за правично судење, но и на политичарите им порачаа да не ги злоупотребуваат за политички поени. Меѓу останатото, му замерија на градоначалникот на Кочани што втор марш по ред не им се придружува.

-Да ве замолиме вас од СДСМ и од ВМРО-ДПМНЕ да не оставите на мира. Ние сме чесни луѓе. Немојте на нашата болка и тага да си правите политички маркетинг. Трпението ни е при крај. Немојте да се заканувате и да уценувате. Ние сме доволно свесни што треба да правиме , немаме што да изгубиме. Она што ни беше најдраго вие ни го убивте, рече Драги Стојанов, татко на Томче Стојанов кој загина во пожарот на 21-годишна возраст.