Изјавата на претседателот Стево Пендаровски во онаа преписка со министерот за здравство, Венко Филипче е изјава која секој човек во моментов ја мисли, вели Ѓулистана Марковска, поранешна пратеничка од редовите на ВМРО-ДПМНЕ.

„Ние имаме претседател кој одговара на сите европски стандарди, досега бил кооперативен и заслужил да биде на тоа место. Во најмала рака изјавата на министерот за здравство би ја искоментирала како неумесна и непрофесионална. Претседателот Пендаровски го кажа тоа што обичниот народ го мисли. Во вакви услови за мене е значајно да размислиме што имаме ние во Уставот? Бидејќи не можеме да бираме претседател на директни избори, со толку малку ингеренции“, анализира Марковска.

Според неа, овие предизвици во време на пандемија треба да не поттикнат да размислиме за измени во Уставот, односно ингеренциите на функцијата претседател.

„Ако сакаме да имаме вистински претседател, тој треба да има можност да го распушти Собранието, да имаше таква моќ, овие изјави од вчера немаше да ги има. Ние вака правиме големи трошоци за избори на претседател без големи ингеренции. Или треба да одиме на варијанта претседателот да го изберат пратениците по пат на политички договор. А доколку остане вака, претседателот треба да има многу поголеми ингеренции“, потенцира поранешната пратеничка.

Осврнувајќи се на политичката борба во Собранието, Марковска верува дека сегашните пратенички состави се сведени на притискачи на дугме без можност за своја борба.

„Набрзо ќе се одбележуваат 30 години од првиот собраниски состав. Ако се види наназад низ историјата, гледам постепено намалување на политичката борба и парламентарната демократија внатре во Собранието. Ние имаме сега два блока во кои едните треба да стискаат црвени копчиња и други да стискаат зелени копчиња со чест на исклучоци“, вели Марковска.

Таа ги критикува извршната власт и пратениците тврдејќи дека се послужиле со политичка хипокризија наместо да бидат први вкацинирани и да дадат пример.

„Да беа вакцинирани пратениците, тие ќе можеа да одат на работа непрекинато. Ова што се случува со вакцинација на нашите во Србија е срамно. Тука не поттикнаа ниту Лекарската комора или политичарите, благодарност до Србија да, но да не можеш да се вакцинираш дома и да бараш начин во Србија, срамно е за нашиот народ“, смета Марковска.

Објаснувајќи зошто во овие услови неблагодарно е да бидеш политичар Марковска смета деак тоа сео снована погрешното толкување на демократијата.

„Демократијата е волја на мнозинството. Таа се сфаќа како анархија, а не е тоа. Ние немаме политичка култура и толку е деградирана функцијата политичар што веќе секој се осмелува да се бави со неа. Ако сте одреден ескперт во една област, со цел да помогнете, вие си пишувате крст на кариерата во другиот домен заради тоа што секој може да ве плука и навредува и не можете да си го додржите дигнитетот и своето размислување. Или сте прво непожелни, или ако ве викнат и се стопите, тогаш не сте ни ваму ни таму“, вели Ѓулистана Марковска, поранешна пратеничка.