Леброн Џејмс повторно блесна кога беше најпотребно и ги однесе Лејкерси до нов триумф над Хјустон од 112-108, со што неговиот тим стигна до убедливо водство од 3-0 во серијата од првата плеј-оф рунда.

Искусниот кошаркар натпреварот го заврши со дабл-дабл од 29 поени и 13 скока, дополнети со шест асистенции, минувајќи повеќе од 45 минути на теренот. Во драматичната завршница, Џејмс погоди тројка на само 13 секунди до крајот за израмнување и избори продолжение, каде што Лејкерси покажаа повеќе смиреност и квалитет.

Силна поддршка доби од Руи Хачимура со 22 поени, како и од Маркус Смарт кој додаде 21. Кај Хјустон, одлична партија запиша Алперен Шенѓун со 33 поени и 16 скока, додека Амен Томпсон забележа дабл-дабл од 26 поени и 11 скока, но тоа не беше доволно за победа.

Вреди да се напомене дека Лејкерси и понатаму настапуваат без Лука Дончиќ и Остин Ривс, додека кај Хјустон повторно отсуствуваше Кевин Дурент.

Во останатите натпревари, Сан Антонио славеше на гости кај Портланд со 120-108 и намали на 2-1 во серијата, а ист резултат во серијата обезбеди и Бостон  по победата над Филаделфија од 108-100 на гостински терен.