ВИДЕО | Лавров се вџашил од тоалетите во Шведска: „Не ми се веруваше, тоа е нехумано“

Фото: Твитер/принтскрин

Рускиот министер за надворешни работи Сергеј Лавров предизвика многу реакции на социјалните мрежи, откако денеска беше објавена снимка на која тој објаснува колку бил шокиран од родово неутралните тоалети што ги видел во Шведска, во кои нема поделба на машки и женски тоалет.

Лавров на дипломатска средба во Москва раскажа за своето искуство од ланскиот состанок на ОБСЕ, кој се одржа во Шведска.

Пред почетокот на средбата, шефот на руската дипломатија прашал за тоалетот, а се вџашил кога му ја покажале вратата на која пишувало само „тоалет“, без вообичаените знаци за машки или женски дел.

Лавров вели дека кога прашал дали тоалетот е машки или женски, домаќините му кажале дека е заеднички.

„Не можев да верувам, но така се случи. Не знаете колку е тоа нечовечки, навистина нехумано“, рече Лавров.

Заедничките, родово неутрални тоалети постојат во Шведска и во многу други земји, но се ретки, а повеќето јавни тоалети и натаму се поделени на „класичниот“ начин – на машки и женски. Пропонентите на „унисекс-тоалетите“ велат дека дизајнот на една просторија за сите, со целосно затворени, одделни кабини, се покажал како најевтин и најпрактичен при изградбата на јавните тоалети.

Видео на денот