Фудбалерите на Лацио се пласираа за полуфиналето на Купот на Италија, каде што ќе се соочат со Аталанта. Римските „небесно-сини“ успеаја да ја елиминираат Болоња на пенали. По 90 минути резултатот беше 1:1, а Лацио победи со 4:1 по ударите од белата точка.

Болоња поведе по половина час игра, Сантијаго Кастро стрелаше за водство по асистенцијата на Моро.

Лацио израмни три минути по почетокот на вториот дел, Нослин се погрижи за израмнување, по асистенцијата на Деле-Баширу.

Во пенал серијата сите беа прецизни во редовите на Лацио: Таварес, Диа, Марушиќ и Тејлор, а кај Болоња патот до мрежата не го пронајдоа Фергусон и Орсолини, единствено гол запиша Далинга.

Во второто полуфинале во куп натпреварување, ќе се соочат екипите на Интер и Комо. Полуфиналните натпревари ќе се играат во периодите од 3-5 март и 21-23 април, додека финалето е закажано за 13 мај 2026 година на стадионот „Олимпико“ во Рим.