Филмските критичари го опишаа новиот биографски филм за Мајкл Џексон како „whitewash“ (чистење на биографијата), истакнувајќи дека остварувањето прикажува „ублажена“ верзија од неговиот живот и кариера. Внукот на пејачот, Џафар Џексон, го толкува „Кралот на попот“ во филмот насловен „Мајкл“, кој го следи подемот на ѕвездата од групата „Џексон 5“ до неговата огромна соло кариера, пишува „Би-би-си“.

Сепак, филмот не се занимава со обвинувањата за сексуална злоупотреба, откако поради историски договор за доверливост (NDA), сцените што се однесувале на нив биле избришани.

„Празен обид за заработка“

Додека „Холивуд репортер“ наведува дека филмот „ќе ги задоволи доживотните фанови кои ја обожаваат музиката“, британскиот „Телеграф“ забележува дека филмот „одбива да се соочи со главниот проблем“.

Критичарката Клариса Логри од „Independent“ му додели само една ѕвезда на филмот, нарекувајќи го „морничав и бездушен обид за заработка“. Таа го спореди со други неодамнешни музички биографски филмови, коментирајќи дека „линијата меѓу кинематографијата и обичниот производ е речиси избришана“.

Во рецензија со две ѕвездички, Питер Бредшо од „Гардијан“ рече дека филмот е „преполн со клише од музички филмови“ и дека се игра „како монтажа од трејлер од 127 минути“.

Избришани сцени поради правни договори

Првично, филмот вклучувал референци за обвинувањата, а голем дел од третиот чин бил посветен на скандалот со Џордан Чендлер. Сепак, според „Variety“, тие снимки биле отфрлени бидејќи адвокатите на наследството на Џексон откриле клаузула во стариот договор со Чендлер која забранува тој да биде прикажан или споменат во кој било филм. Поради тоа, биле направени преснимања, а крајот на филмот бил изменет за да заврши во доцните 80-ти, пред да се појават првите јавни обвинувања.

Пофалби само за главниот актер

Иако филмот како целина доби лоши критики, младиот Џафар Џексон доби пофалби за својата изведба. Критичарите велат дека неговата сличност со вујко му е „неверојатна“ и дека тој целосно „исчезнува во улогата“.

Сепак, Парис Џексон, ќерката на Мајкл, одлучи да не се појавува на премиерите, изјавувајќи претходно дека филмот им се додворува на „фановите кои сè уште живеат во фантазија“. Режисерот Антоан Фукуа, познат по „Training Day“, застана во одбрана на својата визија, велејќи дека музичките сцени се „брилијантни и возбудливи“, но призна дека не навлегувал во вистината зад приватноста на ѕвездата.

ВИДЕО | Наскоро пристигнува филмот за Мајкл Џексон – по глобалната потрага по актер, ќе го глуми неговиот внук