ВИДЕО: Крај за Тотенхем, Ристовски и Адеми во четвртфиналето на Лига Европа!
Се дознаа вечерва првите патници во четвртфиналето на Лига Европа, тие се Арсенал, Динамо Загреб, Гранада и Рома. И покрај триумфот на првиот натпревар од осминафиналето со 2:0, Тотенхем не успеа предноста да ја задржи и на „Максимир“ стадионот во Загреб доживеа елиминација.
Динамо Загреб после продолженијата триумфираше со 3:0, во регуларните 90 минути резултатот беше 2:0. Херој на „модрите“ беше Мислав Оршиќ кој постигна хет-трик, со голови во 62, 83 и 106 минута од мечот.
Стартери кај домаќините беа македонските репрезентативци Аријан Адеми и Стефан Ристовски, овој вториот настапи до 90 минута кога беше заменет од Петар Стојановиќ.
Арсенал на својот „Емирати“ изненадувачки загуби со 0:1 од Олимпијакос, но благодарение на победата од 3:1 на првиот дуел, „топџиите“ ќе играат во четвртфиналната фаза. Грците дојдоа до утешна победа со погодокот на мароканскиот интернационалец Ел Араби во 51 минута од средбата во Лондон. Гостите беа и со играч помалку поради црвениот картон на Ба (82`).
Молде дојде до победа од 2:1 против Гранада, но Шпанците благодарение на триумфот во првиот натпревар од 2:0 ја надминаа и оваа пречка. Норвежаните дојдоа во водство после автоголот на Ваљехо (29`), Солдадо израмни во 72 минута, а конечниот епилог го постави Хестад од пенал (90`).
Рома и на возвратната пресметка беше подобра од Шахтјор Доњецк, после оние 3:0 на првиот дуел, овојпат со 2:1 славеше на гостувањето во Украина. Мајорал на стартот од второто полувреме донесе позитива за римската „волчица“, Украинците се погрижија за егал во 59 минута преку Мораеш, а Мајорал запиша и втор погодок во 72 минута на „Олимпискиот“ стадион во Киев.