Во вчерашниот натпревар од второлигашка конкуренција помеѓу Башкими и Каменица Саса (2:2) се случи инцидент во кој навивач на тимот од Куманово втрча на терен и удри фудбалер на гостинскиот состав.

Судијата без оглед на инцидентот не го прекина натпреварот и остави средбата да се заврши. Од Каменица Саса денес изразија незадоволство затоа што овој потег не беше санкциониран.

„Неприфатлив однос на домашната публика кон нашите фудбалери на вчерашниот меч во Куманово.

Дали насилството се враќа на фудбалските терени? На кој му одговара ваков толерантен однос кон хулиганите и насилниците?

Треба ли секој натпревар наместо надигрување, да биде закана за безбедноста по здравјето и животот на фудбалерите?

Што треба да се случи на фудбалските терени за конкретна реакција на надлежните?

Само ФК Каменица Саса е жртва на два идентични напади со насилство во оваа и минатата сезона. Станува збор за немили настани и случаи кој ги преживуваат многу од екипите при гостувањата кај клубови со реално слаба организација на натпреварите. Безбедноста на фудбалерите и службените лица на натпреварите треба да биде императив во работењето на сите, вклучително и на Фудбалската федерација на Македонија“, стои во соопштението на социјалните мрежи.,