Фудбалерите на Јувентус славеа сигурна победа од 2:0 против Болоња во Торино, во рамките на 33. коло од италијанската Серија А. Избраниците на Лучано Спалети ја продолжија серијата од речиси два месеца без пораз и стигнаа до трета последователна победа без примен гол.

Гостите можеби имаа алиби во згуснатиот распоред и европските обврски, но избраниците на Винченцо Италијано денеска не беа ни блиску до бод.

„Старата дама“ поведе уште во втората минута, одличниот центаршут на Калулу од десната страна го искористи Џонатан Дејвид, кој со глава ја затресе мрежата на немоќниот Раваља.

Првото полувреме помина во целосна контрола на домаќините, кои по водството продолжија да се закануваат преку Консеисао и Холм. Таквиот пристап беше награден на стартот од вториот дел, Турам се погрижи за втор гол и го постави конечниот резултат во 57-та минута.

Тимот од Торино сега е четврти на табелата со 63 бода со пет бода предност во однос на Рома и Комо, додека Болоња се наоѓа на осмото место со 48 освоени бодови.