Фудбалерот на Манчестер Јунајтед, Хари Мегваер, повторно се најде во фокусот на јавноста откако грчки суд му изрече условна затворска казна од 15 месеци по обновеното судење за инцидентот на островот Миконос во август 2020 година.

Репрезентативецот на Англија првично беше осуден на 21 месец и десет дена условно, по обвиненија за нанесување телесни повреди, обид за поткуп и спротивставување на полицијата. Неговиот адвокатски тим веднаш поднесе жалба, што според грчкото законодавство автоматски ја поништи пресудата и овозможи случајот да започне одново.

Во повторената постапка, судот го прогласи Мегваер за виновен за полесен напад, отпор при апсење и обид за поткуп, но со поблага правна квалификација, поради што и казната беше намалена на 15 месеци условно.

Британските медиуми пренесуваат дека фудбалерот и понатаму категорично ја отфрла вината и најавува нова жалба до Врховниот суд, со намера преку правна битка да ја докаже својата невиност.