Пожар, кој се проширил од површините околу паркингот под Калето во Скопје, попладнево зафати повеќе паркирани автомобили, а присебноста на дел од луѓето кои се најдоа таму и брзата интервенција на пожарникарите спречија огнот да уништи повеќе возила на полниот паркинг.

На видеото од пожарот кое го објави новинарката Милка Смилевска, се гледа како тој предизвикал паника кај возачи кои ги паркирале автомобилите таму, кои брзале да ги тргнат своите автомобили.

„Градот Скопје мора да ги ангажира комуналните редари. Пожарите мора да запрат. Секој ден воздухот во Скопје е загаден од неконтролирани огнови“, пишува Смилевска во објава на „Фејсбук“, во исто време заблагодарувајќи им се на скопските пожарникари за ефектната интервенција.

Како што објавија дел од медиумите, огнот зафатил вкупно пет автомобили, од кои два целосно изгореле.

Снимка од пожарот објави и Армијата, информирајќи дека нејзин припадник, професионалниот војник Христијан Божиновски, прв се јавил кај командирот на Воениот стадион и побарал помош со ПП-апарати, а неговата брза реакција помогнала да се спасат другите паркирани коли.

Газда на скопски хотел е брутално претепан од двајца насилници кои ги познава