Кралицата на попот, Мадона, официјално потврди дека на 3 јули ќе го објави албумот „Confessions on a Dance Floor: Part II“, точно 21 година по излегувањето на оригиналното ремек-дело. Новото издание е директно продолжение на нејзиниот легендарен албум од 2005 година и воедно нејзин прв студиски албум по седум години пауза, односно по „Madame X“ од 2019 година.

Мадона веќе подолго време го најавуваше овој проект, објавувајќи снимки од студиото каде што повторно соработува со продуцентот Стјуарт Прајс, човекот кој беше заслужен за специфичниот диско-звук на првиот дел.

Во официјалното соопштение за американските медиуми, Мадона напиша:

„Мораме да танцуваме, да славиме и да се молиме со своите тела. Тоа се духовни практики што ги правиме со илјадници години. Подиумот за танцување е ритуален простор, место каде што се поврзуваш со своите рани и со својата кршливост. Рејвот е уметност. Се работи за поместување на сопствените граници и поврзување со заедницата. Звукот, светлината и вибрациите нè вовлекуваат во транс, го раствораат егото и го запираат времето“.

Оригиналниот албум во 2006 година освои Греми за најдобар електронски/денс албум, а фановите со нетрпение очекуваат да видат дали „вториот дел“ ќе го повтори истиот успех и ќе ја врати диско-треската во 2026 година.

Додека претходниот проект помина со мешани критики, оригиналниот „Confessions“ се смета за нејзино враќање на врвот на поп моќта, носејќи ги планетарните хитови како „Hung Up“, „Sorry“ и „Jump“.