ВИДЕО | „Чудата“ ја одржуваат надежта во Турција – По 170 часа пронајдена 40-годишна жена во урнатините
Спасувачите во Турција извлекоа уште неколку преживеани од урнатините, една недела по смртоносниот земјотрес со јачина од 7,8 степени според Рихтеровата скала, во кој загинаа повеќе од 34.000 луѓе во Турција и Сирија.
Рано утринава, „Анадолу“ објави дека 7-годишното момче Мустафа е спасено во провинцијата Хатај, додека 62-годишната Нафизе Јилмаз била извлечена жива од урнатините во градот Нурдаги, во истата провинција. И двајцата биле заробени 163 часа пред да бидат спасени вчера, недела. Сибел Каја (40) беше извлечена од урнатините на петкатната зграда во Газиантеп 170 часа по земјотресот.
Gaziantep'in İslahiye ilçesinde depremde yıkılan binanın enkazında kalan 40 yaşındaki Sibel Kaya 170 saat sonra sağ çıkarıldı https://t.co/aYLWW1C7YL pic.twitter.com/hkM2XZCbav
— ANADOLU AJANSI (@anadoluajansi) February 13, 2023
60-годишниот Еренгул Одер останал под урнатините 166 часа во провинцијата Антијаман, додека 45-годишниот Џенгиз Полат бил извлечен од урнатините по 162 часа. Полат им рекол на спасувачите дека удирал во шпоретот до него за да направи врева за да го слушнат.
Во истата провинција спасувачките екипи успеале по 158 часа да ја ослободат 10-годишната Асима Балтаци, која штом излегла, од спасувачите побарала желе со вкус на овошје.
Освен тоа, спасувачките екипи во Кахраманмарас се во контакт со тројца преживеани, за кои се верува дека се мајка, нејзината ќерка и бебе.
„Спасувачкиот тим од Ел Салвадор, поддржан од турски спасувачи, успеа да спаси двајца преживеани, една жена и едно дете, по повеќе од 150 часа под урнатините“, напиша претседателот Букеле на Твитер. Тоа се Мелих Ефе Озџан, дете на околу 5 години и Дениз Дал, жена на 30-годишна возраст, кои се хоспитализирани, додаде тој.