Поранешниот висок функционер на Демократската унија за интеграција и градоначалник на Гостивар од редовите на ДУИ, Невзат Бејта, откако ја промени страната и стана кандидат на владејачката коалиција „Вреди“, официјално ја започна кампањата за повторените локални избори во градот.

Бејта денеска свечено го отвори централниот изборен штаб и ги изложи своите клучни планови за развој на градот. Бејта пред собраните претстави амбициозни проекти за Гостивар во следните четири години – отворање на нов главен булевар, изградба на алтернативен пат што ќе го поврзе селото Форино со градот – со цел да се намали сообраќајниот метеж, особено во периодите на поголем прилив на луѓе, главно иселеници, како и гости.

Користејќи остри зборови и тон, Бејта го критикуваше досегашното локално раководство (од АА на А. Таравари, н.з.), тврдејќи дека во претходниот период биле направени злоупотреби на пари, со значително повисоки трошоци за инфраструктура и недоволно реализирани капитални проекти. Бејта нагласи дека долгот на општината изнесува над 30 милиони евра, при што наплатата од комунални такси и дозволи достигнала околу 27 милиони, без јасно објаснета намена на тие средства.

„На 11 јануари, на оваа лоша власт ќе ѝ дојде крајот. Ќе се врати чесната, транспарентна работа во служба на граѓаните“, порача Бејта, најавувајќи крај на, како што рече, системот на криминал и урбана мафија и најавувајќи дека секој што злоупотребил јавни средства ќе сноси одговорност.

Бејта на социјалните мрежи објави и спотот за кампањата и за обидот повторно да стане гостиварски градоначалник во сменетиот дрес.

На отворањето зборуваше и Азир Алиу, кој истакна дека Бејта има капацитет и искуство да го води Гостивар кон подобри услови за живот, како и претседателот на централниот изборен штаб, Аднан Азизи, кој ја пофали неговата „одлучност за политичка сигурност и стабилност“.

Локалниот штаб ќе го предводи Бахар Шабани, кој ќе ја координира кампањата до изборниот ден на 11 јануари 2026 година.