Подземните контејнери што Општина Велес ги постави низ градот, оваа недела се ставени во функција за граѓаните. Покрај веќе поставените два подземни контејнера во близина на театарот и два меѓу Централниот регистар и Основниот суд во Велес, неделава беа поставени поставени и на улица „Илинденска” до Трговскиот центар ВЕ-МОЛ, на улица „Методија Андонов Ченто” и пред пешачкото мостче на Битолска пруга, на улица „8 Септември”.

Како што информираат од Општина Велес, граѓаните ќе можат да го употребуваат подземниот контејнер на тој начин што ќе ја притиснат ножната педала која ќе го крене поклопецот на контејнерот и без да имаат контакт со делови од него, ќе го складираат комуналниот отпад во подземна вреќа, изработена од водоотпорен полиестер со волумен од три метри кубни.

– Контејнерите од страна на ЈКП „Дервен” ќе се празнат секој ден во утринските часови. Комуналното претпријатие набави нова хидраулична дигалка поради специфичниот начин на празнење на контејнерот со негово подигнување на потребната висина и празнење на вреќата, информираат од Општина Велес.

Општина Велес апелира до граѓаните да не паркираат возила пред локациите каде се поставени контејнерите. Контејнерите се исклучиво наменети за комунален отпад и во нив не треба да завршува картонската и ПЕТ амбалажа, градежен шут, жар и пепел од домашни ложишта. За отпадот кој може да се селектира, општината на јавните површини има поставено соодветни садови за овој вид отпад.

Инфомираат дека стандардните метални контејнери кои беа поставени  на овие локации на подземните контајнери се веќе отстранети.